Kalaigaon U.N. Academy: Principal Message, UN Academy, Kalaigaon

Kalaigaon U.N. Academy: Principal Message, UN Academy, Kalaigaon:                                                                            सोलोंथाइया जाबाय गियाननि फुंखा । गियाना जाबाय सोदोमस्रिन...

Principal Message, UN Academy, Kalaigaon

                                                                          

सोलोंथाइया जाबाय गियाननि फुंखा । गियाना जाबाय सोदोमस्रिनि सोरां लामा । सोलोंथाइया जेब्लासिम गियाननि गेजेरजों सोदोमस्रिखौ सोरां होबाय थागोन अब्लासिम बुहुमा जोंबाय थागोन । साफ्रोम गथ’खौ नायबिजिरलायनानै बेबादि सोलोंथाइनि गेजेरजों जोंथि हाथर्खि खालामनो नाजानाया जोंनि बयनिबो मोनसे गेदेर मावनांगौ बिबान दंबोयो ।

आं बे खाबुवावनो कलाइगाव इउ. एन. एकादेमिनि जानानै नोंथांमोन बयनिसिमबो आंनि गोरबोजों अननाय आरो खुलुमनाय बाउहरग्रोदों । 21 जौथाइयाव बर’ माहारिनि गेजेराव इउ.एन.एकादेमि बायदि फरायसालिफोरा हारिनि थाखाय गंसे गंसेबाव सेलेन्जार दैदेनगिरि । दिनै बर’ माहारिया बे माहारियारि फरायसालिनि गेजेरजोंनो गावनि बिखा आरो गोरबोनि खुदियाखौ सेलेन्जार जानानै बुहुमाव आगान होनो फोरोंलांनो सतबांसा लादों । सतबांसा लादों हारिनि हारिमु, राव, थुनलाइखौ फोथांना लाखिनो आरो बुहुमनि दरबाराव सिनायथि होलांनो । बेनिखायनो इउ.एन.एकादेमि फरायसालिफोरा दिनै बर’ माहारिनि मोनसे बिदिन्थि जानानै नुजाफैदों ।

थांनाय 25 फेब्रुवारि, 2003 मायथाइयाव कलाइगाव दख’रा एबसुनि मददजों गुबुन गुबुन माहारियारि, इंराजि बिजोंनि फरायसालिफोरनि बादिनो ओनसोलनि बर’ गथ’फोरखौ जौगा मान थाखोनि सोलोंथाइ होनायनि थांखिजों बै समनि कलाइगाव दख’रा एबसुनि आफादगिरि मानगोनां मुस्रि बकुल बर’ आरो ओनसोलनि मेलेमजिबि आरो राइजो राजाफोरनि नाजानायाव “आलायरन” मुंनि गंसे माहारियारि फरायसालि गायसननाय जायो । बै समाव कक्राझाराव दुलाराय बर’ फरायसा आफादनि नाजानायाव इउ.एन.एकादेमि फरायसालिखौ गायसननानै बर’ गथ’फोरखौ फोरोंनायनि राहा खालामनाय जादोंमोन । इंराजि 2004 मायथाइयाव कलाइगाव “आलायरन” फरायसालिखौबो मुं सोलायनानै इउ.एन.एकादेमि फरायसालि मुं होनाय जादोंमोन आरो मानगोनां मुस्रि बकुल बर’आ सामलायनो हायिनि मानगोनां महेन्द्र बर’आ बिबान बानस’नानै फरायसालिखौ दख’रा एबसुनि मददजों सामलायबाय थानाय जायो । बेबादिनो जोबोद आंखालनि गेजेरजोंबाबो मानगोनां मुस्रि महेन्द्र बर’आ 2007 मायथाइनि जोबनायथिंसिम सामलायनानै नख’रनि असुबिधानि थाखाय हाग’वा जायो आरो बिथाङा फरायसालिखौ गोसो होयियाव फरायसालिनि आबहावाया गाज्रि जायो । बेबादिनो स्‍नि, दाइन दानसो मानगोनां मुस्रि भबेन्‍द्र बर’आ सामलायनो गोनां जायो । 2009 मायथाइनि आगष्त दानाव फरायसालिखौ सामलायनायनि बिबाना आंनि आखाइयाव गोलैयो । मोनसे गेदेर बिबान । बानस’आब्ला फाफ नांगोन बानस’ब्ला रसा नांगोन । हारिनि थाखाय मावलांनायाव आंहा जेबो अजत गैया; थेवबो आं बादि सासे मानसिया बेबादि थैहां-बरबहां मोनसे फसंथानखौ फोथांफिननाया बेसे गोब्राब जागोन बेखौ बयबो मोनदांनो हागोन जानांगौ । इउ.एन.एकादेमि बादि गंसे फरायसालिखौ आखाइयाव लानानै सामलायनो हानायाबो आंनि दुगाथावनानो बाथ्रा जागोनखौनो सानना लानायसै । गिबि बोसोरखौ जोबोद दुखु दाहानि गेजेरजों सामलायनायसै । बेथिं खावसे गथ’फोरखौनो रावखौबो बरसा खालामनो हायियाव फरायसालिनिफ्राय दिहुनना लांनानै सरखारि फरायसालिफोराव हैनो गोनां जाबाय । आद्रा थानाय गथ’फोरनि बिगोमाफोराबो गोनो-गोथो, आख’-फाख’ । लांहां लांहा जानानै थाबाय । बे समावनो दख’रा एबसुनि आफादगिरि मानगोनां दिम्बेस्वर बर’खौ लानानै आं गथ’ बिनो थांनायसै गामिफोराव । फरायसालिनिफ्राय थांनो साननाय गथ’फोरनि बिगोमाफोरखौ बुजाय-आजाय लाखिनायसै । दा जेंनाया फोरोंगिरि । बहा मोननो फोरोंगिरि । फोरोंगिरिफोरा फरायसालिया बायगोनखौ मोनथिनानै फैया जादों । नाथाय बिथांमोनखौबो लाबोनाय जानायसै । जेबो हमनो हायाखैब्लाबो गोसो होथाबनानै सामलायलांनायसै ।

आथिखालाव बर’फोरनि गेजेराव इउ.एन.एकादेमिया मोनसे बयनिबो मेगनाव गोलैनाय माहारियारि सोलोंथाइनि फसंथान । बे गोथार फसंथाननि गेजेरजों बर’फोरा उपेन्द्र नाथ ब्रह्मनि थांखिखौ जाफुंहोनांगोन । जोंनि इयुन जोलैफोरखौ बेयाव फोरोंनानै सुबुं दोहोन सोरजिनायनि थाखाय नाजानांगोन । कलाइगाव इउ.एन.एकादेमियावबो जों बे ओनसोलनि गोदान जोलैफोरखौ जौगा मान थाखोनि सोलोंथाइ होनायनि थाखाय नाजाबोदों । बेनिखायनो जों जौसे जौखोन्दो जाफुंसारनायनि थाखाय खामानि मावबोबाय थादों ।

थांनाय 2010 मायथाइनिफ्राय फरायसाफोरखौ कम्पिउतारनि सोलोंथाइ होनाय जादों । 2013 मायथाइनिफ्राय थाखो सेनिफ्रायनो फरायसाफोरखौ कम्पिउतार सोलोंथाइखौ फोरोंनाय जादों । बे बोसोरावनो फरायसाफोरनि सुबिधानि थाखाय हष्तेलनि राहा खालामनाय जादों । फरायसालिनि जौगानायनि थाखाय गोबां राहा लानाय जादों । बिगोमाफोरनि बिगोमा आफाद दाना होनाय जादों । फरायसालियाव गोदानै बिथोनगिरि सायख’ना थिसननाय जादों। ओनसोलनि रोंगौथि गोनां फोरोंगिरिफोरखौ आलासि फोरोंगिरि हिसाबै लाखिनाय जादों । जों मिजिं थिदों ओनसोलनि बर’ गथ’फोरखौ कलाइगाव इउ.एन.एकादेमियाव फोरोंनानै जोंखौ राइजो राजाया आगान लांनायाव मदद होगोन आरो बोसोन बरायगोन । राइजो राजानि मदद आरो हेफाजाब मोनोब्ला कलाइगाव इउ.एन.एकादेमि फरायसालिखौ जौगा होनो हागोन ।

गोजोनथों

मुस्रि केशब बर’

गोरायुं

कलाइगाव इउ.एन.एकादेमि

UN ACADEMY KALAIGAON MESSAGE FROM FOUNDER

दानि BTAD नि सिङाव थानाय अदालगुरि जिलानि मोनसे बेफार-फालांगिनि थाखाय गोनां जायगा कलाइगाव मैखुमै माइ-माइरंनि थाखाय खाबुगोनां बे कलाइगाव हालामा बायदि हारि, दोहोरोमनि गोरोबथिलि । हाफ्थासेनि मोननै बाजार देवबार आरो बिस्तिबार बाजारखौ लानानैनो कलाइगाव टाउना बांलांबाय थादों । बेयाव दं गंसे थाना, चार्कल अफिस, Block अफिस आरो स्टेट देहाफाहामसालि । सोलोंथाइ लानायनि थाखाय गंसे कलेज, गंसे हायार चेकेण्डारि स्कुल गंसे हिन्जावसा गोजौ फरायसालि, गंनै इंलिस मेदियाम स्कुल, जातिय बिद्यालय गंथाम । कलाइगाव टाउनजों लोगोसे सोरगिदिं गामिफोराव बर’ सुबुं दंब्लाबो कलाइगाव टाउन गेजेराव गंसेबो बर’ बिजोंनि फरायसालि गैयामोन । बेखौ नायनानै 2002 मायथाइयाव बै समाव कलाइगाव आन्सलिकाव आं आफादगिरि आरो अदालगुरि जिला एबसुनि बुंथिगिरि जाना थानाय समाव जोंनि ओनसोलनि दरं जिला बर साहित्य सभानि बारग’ नेहाथारि लोगोसे थुनलाइगिरि मानगोनां धीरेस्‍वर बर नार्जिजों बर बिजोंजों सोलोंथाइ लानायनि बागै सावरायो आरो सानैनि नाजानायाव आन्सलिक एबसु, बर थुनलाइ आफाद, आबोफ आरो हालामनि गोरोंगोरा, राइजो-राजानि मददजों 2003 मायथाइखौ सोलोंथाइ मायथाइ लानानै आलायारण मुंनि गंसे public स्कुल गायसननाय जायो । फरायसालिखौ सामलायनो थाखाय मानगोनां धीरेस्वर बर नार्जि आरो गोरायुं/नेहाथारि महरै आंखौ सायखनानै बिबान होनाय जायो । 2004 मायथाइयाव कोकराझार U.N. एकादेमिनि हांख्रायनायाव मोनसे Teachers Training हाबाफारियाव आलायारण फरायसालिनिफ्राय बाहागो लानाय जायो । बेनि उनावनो बर’ बिजों फरायसालिफोरखौ मोनसे सिरियाव लाबोनायनि थांखिजों बेनि मुंखौ सोलायनानै U.N. एकादेमि मुं दोननाय जायो । दासान्दि बे फरायसालिया बडसा जिरायसालि’ कलाइगावनि लांगोनायावनो दैदेनबाय थानाय जादों । बे फरायसालिनि नैथि सामलायग्रा आफादनि आफादगिरि मानगोनां प्रसन्‍न कुमार बर आरो नैथि गोरायुं मानगोनां महेन्द्र बरनि नाजानाय आरो कलाइगाव दखरा एबसुनि हेफाजाबाव कलाइगाव कलेजनि सोनाबहा थुलुंगाफुरियाव फरायसालिनि थाखाय 5 बिघा हा लानाय जायो । दासान्दि बे हायावनो सोरगिदिं सिमा बेन्दोंजों दिदोम ननि खामानि सोलिबाय थादों । गुदि थाखोनिफ्राय थाखो दाइनसिम बे फसंथाना दानि गोरायुं मानगोनां केशब बरनि दैदेननायाव कम्पिउटार सोलोंथाइबो होनाय जायो । राइजो राजानि मदद आरो हेफाजाब मोनब्ला बे फसंथाना इयुन जुलैनो गुन गोनां सोलोंथाइ होनानै गेरेमसा हारि दानायजों गोनां नोगोरारि दानायाव बिहोमा होनो हागोन ।

बकुल बर

गोरायुं

आलायारण, कलाइगाव